傳心!傳真!

5月10日上左我第一堂傳心堂
課堂上有講到唔好將客人的傳心內容寫在blog上
我寫自己的應該ok既.
首先想講係導師rosina真係非常非常正.如果我係男人一定瘋狂地迷上佢,
就算我宜家係一個女人,我都一樣覺得佢好正,好迷人,好吸引!!
同時助教妹妹都好好呀!仲有joyce都好nice好nice.
去上堂雖然好攰好攰,可以話有種虛脫既感覺,但見到導師佢地會覺得好舒服好溫馨.
同學都好好,個個都好有善(好似話之前有一班上堂,上到想打交.....)
到講下我第一次去call動物既感覺,其實我既感覺唔係話好強,可能我比較雜念.
我只感覺到好少都已經令我筋疲力盡.(頭痛得要死)
我第一個call既係仔b.....一次call貓就俾貓話我......激死!!!
內容如下:
puiwah:仔b你同我傾陣計好無呀?媽媽上緊堂呀,我尋晚同你講左我會上堂同你傾計既呢!
仔b:懶懶閒咁訓係到望住我,無講野.
puiwah:咁我想問呢你鍾意邊隻貓朋友仔多d呀?俾3個你揀,第一個叔公
(就係呢個時候,係圖面既左上角叔公就衝左入黎我地既對話)
叔公:好肚餓,好肚餓呀,你幾時返我好肚餓.........(不停咁講....)
仔b:你唔好嘈啦!你好嘈呀,我唔鍾意你呀...你好煩呀...
我只係feel到好嘈,佢地2個係咁重複佢地講既野...
puiwah:咁仔b你鍾唔鍾意青雲呀?
仔b:邊個係青雲呀?
我send左個青雲樣俾佢睇.
仔b:哦!佢呀,ok丫!
puiwah:咁亞咩呢?
仔b:亞咩係咩人黎嫁?
我想再send圖片俾佢睇,但係佢同叔公又係到嘈之前嘈果d野.....
到呢到我好頭痛就停左..
休息左一陣,再搵仔b問第2個問題.
其實想問佢係唔鍾意食牛肉,定淨係唔鍾意食和牛
puiwah:仔b呀!仔b..
仔b:唔好煩啦,我要訓呀!你咁煩嫁!!
puiwah:咁你訓啦!!(無言.....)
跟住又搵下青雲,只見青雲望住我傻下傻下咁....
感覺係佢覺得好得意.則下則下個頭咁.
但就無講過野.

第二日上堂到過身既寵物(喊死我了)
呢次係call我2年前過身既一隻大狗狗
佢係一隻大白熊,未滿一歲有130磅.佢企起身可以踏到我肩膀
係佢歲半左右就因為一次佢自己偷走左出去玩,宜俾2隻狗狗咬死左佢,
我係出佢常去既地方搵佢既時候,見到有2隻野狗圍住佢
當時佢已經奄奄一息........
我同xx抱佢返到屋企,跟住佢就吐血,我就係耳邊同佢講
你去啦,我係你身邊陪住你去啦,你去左就會無痛苦嫁啦
我知你宜家好痛,好辛苦.你去啦,我陪住你.....
你唔洗擔心我嫁啦....
跟住佢就哽左一聲,好長既一聲,就係我手上去左啦...
xx話佢成日都應為自己係bb,當人人都係同佢玩,佢走去撩人地玩,點知d野狗唔係同佢玩.
我揀左自己去call佢,點知一call佢我係張唔開我雙眼.
我見到佢係佢以前訓開果個位到望住我,我覺得好唔舒服,好暈,成個人好似係到轉咁.
不停咁流眼淚.係停唔到,唔知咩事想收線又收唔到,只係有一種好想抱住佢,但又捉唔到既感覺.
跟住喊到個人抽搐都係停唔到,成個人好唔舒服,好暈好心痛
跟住我自己講要冷靜落黎,咁我慢慢深呼吸控制到個情緒,再嘗試打返開雙眼.
一打開對眼暈既感覺係即刻無晒,只係得返痛,我唔知點解釋呢個感覺...
落左堂我係要食止痛藥

後記:
有同學幫我問青雲野既時候.點知青雲話佢好唔舒服,隻左眼好唔舒服,話俾人咬,叫同學唔好煩佢
回家立刻去睇青雲,個死仔左眼真係斬斬下.原兇係邊個呢?
答案係亞咩,因為亞咩係右眼斬斬下,佢地互咬既結果.....

p.s.好攰,好攰.........我想訓3日3夜